ଘରକୁ ଫେରି 

ଜଳନ୍ତା ଦିପହରେ ଘରକୁ ଫେରି ସେ 
ମାଆକୁ ଖୋଜୁଥିଲା ଘରସାରା 
ରନ୍ଧାଘରେ ନଥିଲା ମାଆ 
ବାଡ଼ିପଟେ ବି ନଥିଲା 
 ଘରେ କେଉଁଠି ନଥିଲା 

ସେ ଖୋଜୁଥିଲା 
ଖୋଜି ଖୋଜି ହନ୍ତସନ୍ତ 
ଖଟତଳ ବି ଚାହିଁଲା,
ଅଳନ୍ଧୁ ଅଳିଆ ପୁରୁଣା ଜୋତା ହିଁ ପାଇଲା
ବ୍ୟାକୁଳ ସେ ବାହାରକୁ ଧାଇଁ 
ଆମ୍ମା ଆମ୍ମା ଡାକୁଥିଲା 

କୋଉଠି ତୁ ଆମ୍ମା!! ଭୀଷଣ ଭୋକିଲା 
 ମୁଁ ଆସିଲିଣି ଘର....କିନ୍ତୁ ଉତ୍ତର ନଥିଲା 
ଖରାରେ ଜଳୁଥିବା ନିର୍ଜନ ସାହୀରେ 
ତା ସ୍ୱରର ପ୍ରତିଧ୍ୱନି ବି ନଥିଲା 

ହଟାତ ତା' ମନେ ପଡିଗଲା 
ଏବେ ସେ ଏକଷଠି ବର୍ଷର 
ଏବଂ ତାର ମାଆ ନଥିବାଟି 
                       ନଥିବା ଚାଳିଶ ବର୍ଷର......