ଏ.ଆଇ କୁ ନେଇ ଆଜି କାଲି କେତେ କ’ଣ ଚର୍ଚ୍ଚା । ଆମମାନଙ୍କ ଅଜଣାତରେ ଆମେ ଏ.ଆଇ ସହ ଅନେକ ଦିନରୁ ସଂପୃକ୍ତ ହେଇସାରିଛେ । ଏ.ଆଇ ମାନେ ଆର୍ଟିଫିସିଆଲ୍ ଇଣ୍ଟେଲିଜେନ୍ସ । ଯେବେଠାରୁ ସ୍ମାର୍ଟ ଫୋନ୍ ଆମମାନଙ୍କ ଜୀବନ ସହ ଅଙ୍ଗାଅଙ୍ଗୀ ଭାବରେ ଯୋଡିହେଇଗଲାଣି ସେବେଠୁ ଏ.ଆଇ ଧିରେ ଧିରେ, ଧାପେ ଧାପେ କରି ଆମକୁ ଓ ଆମ ବ୍ୟକ୍ତିଗତ ଜୀବନକୁ କବଳିତ କରିବାକୁ ଲାଗିଲାଣି । ପରିସ୍ଥିତି ଏମିତି ଯାଗାରେ ପହଞ୍ଚିଲାଣି, ଯେଉଁଠି କିଛି ବୈଜ୍ଞାନିକ ଚେତାବନୀ ଦେଲେଣି ଏ.ଆଇକୁ ନେଇ ଗବେଷଣା ବନ୍ଦ ନକଲେ ଆଗକୁ ତାହା ପୁରା ମାନବ ସଭ୍ୟତା ପ୍ରତି ବିପଦ ହେଇ ଠିଆହେବ ।
ଅନ୍ୟାନ୍ୟ ବିଭାଗରେ ଭାଗ ଦଖଲ୍ କଲାପରି ଏ.ଆଇ କଳାରାଜ୍ୟରେ କିଛି କମି କାଣ୍ଡକାରଖାନା କରିନି । ସେ ବିଷୟରେ ପରେ କଥା ହେବା । ଏବେ ଏବେ ଏ.ଆଇ ଓ ଫଟୋଗ୍ରାଫିକୁ ନେଇ ବଡ଼ ରୋଚକ ଘଟଣାଟି ଘଟିଛି । ଯାହାକି ଫଟୋଗ୍ରାଫି ଦୁନିଆକୁ ଏକ ପ୍ରକାର ଦୋହଲାଇ ଦେଇଛି ।
ଘଟଣାଟି ହେଲା , ବୋରିସ୍ ଏଲଡାଗସେନ୍ ନାମକ ଜଣେ ଜର୍ମାନ୍ ଫଟୋଗ୍ରାଫର୍ ସୋନି ୱାର୍ଲ୍ଡ ଫଟୋଗ୍ରାଫି ପ୍ରତିଯୋଗିତା ପାଇଁ ଖଣ୍ଡେ କଳା ଧଳା ଫଟୋଗ୍ରାଫି ଦାଖଲ କରିଥିଲେ । କଳାଧଳା ରଙ୍ଗର ଏହି ଫଟୋରେ ଜଣେ ଯୁବତୀ ଆଗରେ ଅଛନ୍ତି ଓ ଜଣେ ସ୍ତ୍ରୀ ଲୋକ ତାଙ୍କ ପଛରେ ଅଛନ୍ତି । ଫଟୋଟିର ଶୀର୍ଷକ ରହିଛି ‘ଇଲେକଟ୍ରିସିଆନ୍’ । ଫଟୋଟିର ପରିବେଶ ବର୍ଣ୍ଣନା ଅନୁସାରେ ଦର୍ପଣ ସାମ୍ନାରେ ବିବାହ ପାଇଁ ବେଶ ପିନ୍ଧାର ସମୟ ପରି ଦିଶୁଛି । ଘଟଣା କ୍ରମେ ବିଚାରକମାନଙ୍କୁ ଫଟୋଟି ଭଲ ଲାଗିଲା ଓ ଚମତ୍କାର ଫଟୋଟି ପ୍ରତିଯୋଗିତାରେ ପ୍ରଥମ ପୁରସ୍କାର ପାଇଲା । କିନ୍ତୁ ପୁରସ୍କାର ଘୋଷଣାର ଗୋଟେ ସପ୍ତାହ ପରେ ଏଲଡାଗସେନ୍ ତାଙ୍କ ବ୍ୟକ୍ତିଗତ ୱେବସାଇଟ୍ ରେ ଲେଖିଲେ ଯେ, ସେ ଏହି ପୁରସ୍କାର ଗ୍ରହଣ କରୁନାହାଁନ୍ତି । କାରଣ, ସେ ଯେଉଁ କ୍ରିଏଟିଭ୍ ଫଟୋଗ୍ରାଫି ବିଭାଗ ପାଇଁ ତାଙ୍କ ଫଟୋ ଦାଖଲ କରିଥିଲେ ତାହା ପ୍ରକୃତରେ କୌଣସି କ୍ୟାମେରାରେ ଉଠାଯାଇନି । ଫଟୋଟି ସଂପୂର୍ଣ୍ଣ ଭାବରେ ଏ.ଆଇ ଦ୍ୱାରା ପ୍ରସ୍ତୁତ କରାଯାଇଛି । ପ୍ରକୃତ ଅର୍ଥରେ ଏହା ଫଟୋଗ୍ରାଫି ନୁହେଁ । ପ୍ରତିଯୋଗିତାରେ ଏ.ଆଇ ଫଟୋଗ୍ରାଫି ପାଇଁ କୌଣସି ବିଭାଗ ନଥିଲେ ମଧ୍ୟ ସେ ଜାଣି ଜାଣି ତାଙ୍କ କାମଟିକୁ ଦାଖଲ କରିଥିଲେ । ତାଙ୍କର ଉଦ୍ଦେଶ୍ଯ ଥିଲା ଏ.ଆଇ ବିଷୟରେ ଏବେ ଖୋଲା ଖୋଲି ଗଭୀର ଭାବରେ ଆଲୋଚନା କରାଯାଉ । ଏଲଡାଗସେନ୍ ଅନେକ ଦିନ ହେଲାଣି ଏ.ଆଇ. ସହାୟତାରେ ଫଟୋଗ୍ରାଫି କରୁଛନ୍ତି । ଏଇଠି ଆମକୁ ମନେ ରଖିବାକୁ ହେବ ଯେ ଏ ଆଇ ଓ ଡିଜିଟାଲ୍ ଫଟୋ ଅଲଗା କଥା ।
ନିଜର ଇନଷ୍ଟାଗ୍ରାମ୍ ହ୍ୟାଣ୍ଡେଲରେ ବୋରିସ୍ ଏଲଡାଗସେନ୍ ସେ ପୁରସ୍କାର ପ୍ରତ୍ୟାଖାନ କଲାପରେ ତାଙ୍କୁ ଲୋକମାନଙ୍କ ଠାରୁ ମିଳିଥିବା ସଦିଚ୍ଛା ଓ ଭଲପାଇବାକୁ ନେଇ ଧନ୍ୟବାଦ ଜଣାଇଛନ୍ତି । ସୋନି ଏପଟେ ଏଲଡାଗସେନ୍ ଙ୍କ ନାମକୁ ତାଙ୍କ ୱେବ୍ ସାଇଟ୍ ରୁ ହଟାଇ ଦେଇଛି । ଏମିତି ଦେଖିଲେ ଏହା ନିଶ୍ଚିତ ଏକ ଐତିହାସିକ ଘଟଣା । କାରଣ ଇତିହାସରେ ପ୍ରଥମଥର ପାଇଁ ଏ.ଆଇ ଫଟୋ ପାଇଁ ପୁରସ୍କାର ପାଇଛି । ଏବେ ସବୁଠାରୁ ବଡ଼ ପ୍ରଶ୍ନ ଯେ ଆଗକୁ ପ୍ରତିଯୋଗିତା ଆୟୋଜନ କରୁଥିବା ସଂସ୍ଥାମାନେ ପ୍ରକୃତ ଫଟୋ ଓ ଏ.ଆଇ ଜେନେରେଟେଡ୍ ଫଟୋ ମଧ୍ୟରେ ଫରକ୍ କେମିତି ମାପିବେ? କାରଣ ଆଗାମୀ ଫଟୋଗ୍ରାଫି ପ୍ରତିଯୋଗିତା ମାନଙ୍କରେ ଏ.ଆଇ. ଜେନେରେଟେଡ୍ ଫଟୋ ଅଧିକରୁ ଅଧିକ ପରିମାଣରେ ନିଶ୍ଚୟ ଦାଖଲ ହେବ ।
୫୨ ବର୍ଷୀୟ ଏଲଡାଗସେନ୍ ଫଟୋଗ୍ରାଫି ଓ ଭିଜୁଆଲ ଆର୍ଟରେ ପାଠ ପଢିଛନ୍ତି । ତାଙ୍କର ଭାରତ ସହ ସଂପୃକ୍ତି ହେଲା, ସେ ହାଇଦ୍ରାବାଦର ସରୋଜିନୀ ନାଇଡୁ ସ୍କୁଲ୍ ଅଫ୍ ଆର୍ଟସ୍ ଆଣ୍ଡ କମ୍ୟୁନିକେସନ୍ ଠାରେ କଳା ଶିକ୍ଷା ଲାଭ କରିଛନ୍ତି ।
ବୋରିସ୍ ଏଲଡାଗସେନ୍ ଙ୍କ ଏ.ଆଇ ଜେନେରଟେଡ୍ ଫଟୋଟି ଏଇଠି ଦିଆଯାଇଛି । ଫଟୋ ଦେଖି ଏବେ ଜାଣି ହେଉଛି କି ଏ.ଆଇ ଏମିତି କିଛି ଚମତ୍କାରିତା କରି ପାରିବ ? ଏକଦା ଫଟୋକୁ ଏକ ବିଶେଷ ପ୍ରାମାଣିକ ତଥ୍ୟ ଭାବରେ ଯାହା ଗ୍ରହଣ କରା ଯାଉଥିଲା ସେଥିରେ ଏହାର ପୂର୍ଣ୍ଣ ଛେଦ ପଡିଲା ଜାଣ । ଏବେ ମଣିଷ ଓ ମଣିଷ ଭିତରେ ଆଉ ପ୍ରତିଯୋଗିତା ହେବନି । ପ୍ରତିଯୋଗତା ହେବ ଏ.ଆଇ. ସାଙ୍ଗରେ । ଶେଷକୁ କାହାର ଜିତାପଟ ହେବ କିଏ ଜାଣେ ?
