ରମା ଦୁଆଜି ହେଉଛନ୍ତି ଜୋହରାନ ମମଦାନୀଙ୍କ ପତ୍ନୀ । ଜୋହରାନ ମମଦାନୀ ଆମେରିକାର ବିଖ୍ୟାତ ସହର ନ୍ୟୁୟର୍କର ମେୟର ଭାବରେ ନବ ନିର୍ବାଚିତ ହୋଇଛନ୍ତି । ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଓ ତାଙ୍କ ମତର ଦୃଢ ବିରୋଧି ଭାବରେ ସେ ପରିଚିତ ।
ଜୋହରାନ ମମଦାନୀଙ୍କୁ ମାତ୍ର ବର୍ଷେ ତଳେ ଆମେ ଜାଣିନଥିଲେ । ଆମେ କିଏ ହେ? ଖୋଦ ନ୍ୟୁୟର୍କ ବାସିନ୍ଦା ବି ଭଲରେ ଜାଣିନଥିଲେ । ଯେତେବେଳେ ଜାଣିଲେ ସେତେବେଳେ ଜାଣିଲେ ସେ ପ୍ରଖ୍ୟାତ ଭାରତୀୟ ସିନେମା ନିର୍ଦ୍ଦେଶିକା ମୀରା ନାୟାରଙ୍କ ପୁଅ ।
ମୋର ଏତେ କଥା କହିବାର କାରଣ ହେଲେ ରମା ଦୁଆଜି । ରମା ଜଣେ ଇଲୁଷ୍ଟ୍ରେଟର, ଆନିମେଟର ଓ ସେରାମିଷ୍ଟ । ଆଗରୁ କଳା ଧଳାରେ ଅଙ୍କିତ କିଛି ଛବି ମୁଁ ଦେଖିଥିଲି । କିନ୍ତୁ ଅନ୍ୟାନ୍ୟ ପରିଚୟର ଯୋଗସୂତ୍ର ଜାଣିନଥିଲି। ରମାଙ୍କର ପୁରା ନାମ ହେଉଛି Rama Sawaf Duwaji । ୩୦ ଜୁନ ୧୯୯୭ରେ ଆମେରିକାର ଟେକ୍ସାସ ରାଜ୍ୟର ହୁଷ୍ଟନ ସହରରେ ସିରିଆର ଏକ ମୁସଲମାନ ପରିବାରରେ ତାଙ୍କର ଜନ୍ମ । ବାପା ଜଣେ ସପ୍ଟଂଓୟାର ଇଞ୍ଜିନିୟର ଓ ମା ଜଣେ ଡାକ୍ତର । ରମାଙ୍କୁ ନଅ ବର୍ଷ ବୟସ ହେଲାବେଳକୁ ତାଙ୍କ ପରିବାର ଦୁବାଇ ଚାଲିଯାଇଥିଲେ । ପିଲାଦିନୁ ରମା ଚିତ୍ର କରିବାକୁ ଭଲପାଉଥିଲେ । ବାପା ମା କାମକୁ ବାହାରିଗଲାପରେ ସେ ନିଜକୁ ନିଜ ଛବି ଭିତରେ ବୁଡାଇ ରଖୁଥିଲେ । ସ୍କୁଲର ପଢା ବହି ଓ ନୋଟରେ ସବୁବେଳେ ସେ ତାଙ୍କ ଚିତ୍ର ସବୁ ଆଙ୍କିପକାଉଥିଲେ । ବାପା ମା ଚିତ୍ର କରିବାକୁ ବିରୋଧ କରୁନଥିଲେ, କିନ୍ତୁ ପାଠ ପଢାରେ ମନ ଦେବାକୁ ତାଗିଦ କରୁଥିଲେ ।
ରମାଙ୍କର ଚିତ୍ର ଆଙ୍କିବାର ଥିଲା । ସେ ଜାଣିଥିଲେ ବଡ ହେଲେ ସେ କ’ଣ କରିବେ । ହାଇସ୍କୁଲ ପାଠପଢା ସାରିଲା ପରେ ଭର୍ଜିନିଆ କମନୱେଲଥ ୟୁନିଭରସିଟି ସ୍କୁଲ ଅଫ୍ ଆର୍ଟସ୍ କୁ ଚାଲିଆସିଲେ । ତା’ ଆଗରୁ କତାରର ଦୋହାରେ ବି ପାଠ ପଢୁଥିଲେ । ପଢା ସରିଲା ପରେ ରମା ବାପାମାଆଙ୍କ ପାଖକୁ ଦୁବାଇ ଫେରି ଆସିଲେ ଏବଂ ଲେବାନନ ଓ ପ୍ୟାରିସ ଆଦି ସ୍ଥାନରେ ଆର୍ଟିଷ୍ଟ ଇନ୍ ରେସିଡେନ୍ସିରେ ଯୋଗଦେଲେ । କିଛି ମାସ ପରେ ରମାଙ୍କୁ ନ୍ୟୁୟର୍କ ସହରର ସ୍କୁଲ ଅଫ୍ ଭିଜୁଆଲ ଆର୍ଟରେ ପାଠ ପଢିବାକୁ ସ୍ଥାନ ମିଳିଗଲା ଓ ସେ ସେଠାରେ ଅଳଂକରଣରେ ପାଠ ପଢିଲେ । ସେଉଠୁ ହିଁ ସ୍ନାତ୍ତକୋତ୍ତର ଡିଗ୍ରୀ ହାସଲ କଲେ ।
ରମାଙ୍କ ଅଳଙ୍କରଣରେ ମୁଖ୍ୟତଃ ଆରବ ଦେଶର ସଂସ୍କୃତିର ପ୍ରଭାବ ଥାଏ । ମଧ୍ୟଏସୀୟ ଦେଶମାନଙ୍କରେ ଥିବା ସାମାଜିକ ବୈଷମ୍ୟତା ଓ ନାରୀ ସ୍ୱାଧୀନତାକୁ ନେଇ ସେ ତାଙ୍କର ଛବି କରନ୍ତି । ମୁଖ୍ୟତଃ କଳା ଧଳା ରଙ୍ଗ ଓ ସୁକ୍ଷ୍ମ ରେଖାରେ ତାଙ୍କର ଚିତ୍ର ଅଙ୍କା ହେଇଥାନ୍ତି । ୟୁରୋପୀୟ କଳାରେ ବ୍ୟବହୃତ ସୌନ୍ଦର୍ଯ୍ୟର ମାନକର ସେ ସମାଲୋଚନା କରନ୍ତି । ନିଜର ଜୀବନ ଓ ଅନୁଭୂତି, ଚାରି ପାଖର ସାଧାରଣ ଦୈନନ୍ଦିନ ଜୀବନଧାରା ତାଙ୍କ ଚିତ୍ରର ମୁଖ୍ୟ ବିଷୟ ବସ୍ତୁ । ରମା ଜଣେ ମାନବବାଦୀ ଓ ସେ ବ୍ୟକ୍ତି ଜୀବନର ସ୍ୱାଧିନତାକୁ ଅଗ୍ରାଧିକାର ଦିଅନ୍ତି । ଚିତ୍ରକୁ କେବଳ ସୌନ୍ଦର୍ଯ୍ୟର ବସ୍ତୁ ଭାବରେ ନଦେଖି ସାମାଜିକ ମତ ଭାବରେ ଦେଖିବାକୁ ସେ ଚାହାଁନ୍ତି । ୨୦୨୩ ମସିହରେ ରମା ଗାଜା ପଟି ଉପରେ ଇସ୍ରାଇଲ୍ ଚଳାଇଥିବା ନର ସଂହାରକୁ ନେଇ ବହୁତ ଗୁଡେ ଚିତ୍ର ଆଙ୍କିଥିଲେ, ଯାହାକି ଅନେକଙ୍କ ଦୃଷ୍ଟିରେ ପଡିଥିଲା । ଏହା ଛଡା ସେ ସୁଦାନର ଗୃହ ଯୁଦ୍ଧ ଓ ଇସ୍ରାଇଲର ହଜିବୁଲ୍ଲା ଗଣ୍ଡଗୋଳକୁ ନେଇ ବି ଅନେକ ଛବି କରିଛନ୍ତି । ରମାଙ୍କ ଅଳଂକରଣ ସବୁ ବିବିସି, ଦି ନ୍ୟୁୟର୍କ ଟାଇମସ୍, ଦି ୱାସିଂଟନ୍ ପୋଷ୍ଟ, ଟେଟ୍ ମଡର୍ଣ୍ଣ ଆଦି ସମ୍ମାନଜନକ ପତ୍ରପତ୍ରିକାରେ ସ୍ଥାନ ପାଇଛି । ସେ ସ୍ପଟିଫାଏ ଓ ଆପଲ କମ୍ପାନୀ ସହ ମଧ୍ୟ କୋଲାବରେସନରେ କାମ କରିଛନ୍ତି ।
ରମାଙ୍କର ଏକ ଡେଟିଂ ଆପ୍ ରେ ୨୦୨୧ରେ ଜୋହରାନ ମମଦାନୀଙ୍କ ସହ ଚିହ୍ନା ହେଇଥିଲା । ହୁଏତ ଦୁହିଁଙ୍କ ମାନବବାଦୀ ଚିନ୍ତାଧାରା ଦୁହିଁଙ୍କୁ ପରସ୍ପରର ନିକଟତର କରିଥିଲା । ୨୦୨୪ରେ ଦୁହିଁଙ୍କର ନିର୍ବନ୍ଧ ହେଇଥିଲା ଓ ୨୦୨୫ରେ ଦୁଇ ପ୍ରେମୀ ବିବାହ କରିଥିଲେ । ମେୟର ନିର୍ବାଚନ ପ୍ରକ୍ରିୟା ସମୟରେ ରମା ନିଜକୁ ଲୋକଲୋଚନରୁ ଦୁରେଇ ରଖିଥିଲେ । ଜୋରାନଙ୍କ ସହ ଖୋଲାମେଲାରେ ମିଳାମିଶା କରୁନଥିଲେ । କିନ୍ତୁ ପ୍ରଚାରରେ ବ୍ୟବହୃତ ହେଉଥିବା ପ୍ରତିଟି ଡିଜାଇନ୍ ରେ ତାଙ୍କର ସ୍ପର୍ଶ ଥିଲା । ନ୍ୟୁୟର୍କ ସହରର ମେୟର ଭାବରେ ଜୋହରାନ ମମଦାନୀଙ୍କ ବିଜୟ ପରେ ଆସନ୍ତା ୧ ଜାନୁୟାରୀ ୨୦୨୬ ଠାରୁ ରମା ଦୁଆଜି ନ୍ୟୁୟର୍କ ସହରର ସମ୍ମାନ ଜନକ ପ୍ରଥମ ମହିଳା ଭାବରେ ପରିଗଣିତ ହେବେ । ପ୍ରତିବାଦ ଓ ଜନପକ୍ଷର ପକ୍ଷ ନେଉନଥିବା ଆମ ଏଠାର ଚିତ୍ରଶିଳ୍ପୀ ଓ ଅଳଂକରଣ ଶିଳ୍ପୀମାନେ ରମା ଦୁଆଜିଙ୍କ ଚିତ୍ର ଦେଖିବା କଥା ।
